Sesorah Basa Jawi Dhaharan Tradisional lan Dhaharan Modern

PANDADARAN SESORAH BASA JAWI

PUTRA-PUTRI KELAS XII SMA N 1 PAKEM

“DHAHARAN TRADHISIONAL LAN DHAHARAN MODEREN”

DENING :

AISYAH NURUL IQLIMA

XII MIPA 2

04

SMA NEGERI 1 PAKEM

TAHUN AJARAN 2017/2018

Assalamualaikum warrahmatullahi wabarakatuh

Bapak pangarsaning pawiyatan SMA N 1 Pakem ingkang satuhu kinabekten, Bapak Suryadi ingkang minulya ing budi. Punapa dene para kanca ingkang winantu ing suka basuki.

Purwakaning atur sumangga kula lan panjenengan sedaya ngaturaken puji syukur dumateng Gusti ingkang Maha Agung, ingkang sampun paring kanugrahan satemah ing adicara pandadaran sesorah basa jawi putra-putri SMA N 1 Pakem menika kula lan panjenengan sedaya saged pepanggihan wonten papan menika kanthi rahayu nir ing sambekala.

Pak guru lan para kanca,

            Wonten ing pepanggihan menika keparenga kula “Aisyah Nurul Iqlima” badhe ngaturaken andharan kanthi irah-irahan “Dhahran Tradhisional lan Dhaharan Modern”.

Miturut Winarno, dhaharan tradhisional inggih menika dhaharan ingkang dipun damel kanthi tradhisional lan dipun dhahar dening masyarakat daerah tertemtu kanthi rasa khas ingkang dipunremeni dening masyarakat daerah kasebat. Dhaharan tradhisional nggadhahi kathah kasaenan inggih menika dipundamel kanthi bahan ingkang alami, nggadhahi kandhungan gizi, nyehatakaen lan aman dipun dhahar, sarta murah lan gampil anggenipun damel.

Salah satunggalipun dhaharan tradhisional inggih menika pecel. Kita sedaya sampun mangertosi bilih dhaharan pecel punika dipundamel saking maneka warni sayuran ingkang dipun godhog lan dipun paringi bumbu kacang. Saking mriku kita saged mangertosi bilih pecel menika alami, nyehataken, murah, lan gampil anggenipun damel. Pecel menika ugi parlambang masyarakat Indonesia khususipun masyarakat Jawi ingkang agraris.

Wonten sanes kawonten dhaharan modern langkung dipun remeni dening para anem. Dhaharan modern nggadhahi warna lan rasa ingkang narik kawigaten. Daharan munika dipun damel kanthi piranti-piranti modern lan bahan damelan. Ananging dhaharan kala wau dereng mesthi aman kangge dipun dhahar, amargi wonten dhaharan ingkang dipun damel ngangge pengawet, pewarna, lan saged mawon jajanan wau dipun damel kanthi mboten higienis. Dhaharan menika ugi dereng mesthi dipundamel kanthi bahan ingkang sae lan bergizi. Sarta biasanipun dhaharan punika nggadhahi regi ingkang awis.

Tuladha dhaharan modern inggih punika burger, pizza, fried chicken, french fries, hotdog, lan sak piturutipun. Dhaharan punika sanget narik kawigaten kagem para anem jaman sakmenika. Mboten namung nggadhahi regi ingkang awis, ananging dhahran menika mboten ngandhung gizi ingkang cekap lan malah ngandhung kolesterol ingkang inggil sarta dereng mesthi halal.

Nah, saking kalih dhaharan wau panjenengan sedaya remen dhaharan ingkang pundi?

Para rawuh ingkang minulya,

            Menawi kita tingali sakiwa tengen kita sedaya kathah sanget tiyang ingkang yuswanipun nembe 45 tahun, 50 tahun, sampun gerah stroke, diabetes, kolesterol, hipertensi, lan sanes-sanesipun ingkang dipunarani penyakit degeneratif. Penyakit-penyakit punika salah satunggaling akibat saking dhahar dhaharan ingkang mboten sae. Menapa panjenegan sedaya kersa gerah kados menika? Menawi mboten, tegesipun kita sedaya kedhah milih dhaharan ingkang sae, lan dhahar sakcekapipun kemawon.

Babagan dhahar dhahran ingkang sae punika dipun sebataken wonten al quran surat al baqarah ayat 168 ingkang waosanipun: 

يَا أَيُّهَا النَّاسُ كُلُوا مِمَّا فِي الْأَرْضِ حَلَالًا طَيِّبًا وَلَا تَتَّبِعُوا خُطُوَاتِ الشَّيْطَانِ ۚ إِنَّهُ لَكُمْ عَدُوٌّ مُبِينٌ

Ingkang artinipun:

“He para manungsa, sira padha mangana kabeh barang kang ana ing Bumi, kang halal sarta becik, lan aja padha nurut tindak-tanduking syetan, sebab syetan iku cetha mungsuh bebuyutan tumrap sira kabeh.”

 Menawi kita sampun mangertosi bilih kita kedah milih dhaharan ingkang halal lan sae, artinipun kita kedhah remen dhaharan tradhisional lan nebihi dhaharan moderen ingkang kirang nyehataken. Punika mboten namung supados badan kita sehat kemawon, anaging ugi kangge wujud taat dhumateng Gusti ingkang Maha Kuwaos.

Ananging saking punika wau wonten masalah enggal. Masalah menapa? Inggih punika ing jaman sakmenika para anem sampun mboten remen lan mboten kenal kalian dhaharan tradhisional. Sarta sampun arang ingkang sade dhaharan tradisional menika wonten kutha-kutha ageng.

Lajeng menapa solusinipun? Solusinipun ingkang sepisan inggih menika ngawontenaken inovasi babagan dhaharan tradhisional. Dhaharan tradhisional wau dipun damel kanthi maneka bentuk, warna, lan rasa supados saged narik kawigaten para anem, ananging ampun kesupen dhahran punika tetep dipundamel kanthi bahan-bahan ingkang alami lan nyehataken.

Solusi ingkang nomer kalih inggih menika babagan pemasaran. Dhaharan tradhisional punika dipunpasaraken kados dhaharan moderen. Dhaharan ingkang awet saged dipunpasaraken kanthi online lan saged dipunsade wonten kafe-kafe. Rumah makan ingkang sade dhaharan tradhisional ugi saged kerjasama kalian jasa ojek online kados “gojek, grab, lan uber” kangge ndherekaken dhaharan dumugi wonten konsumen.

Saking kalih solusi menika mugi-mugi dhaharan tradhisional menika langkung dipunkenal lan langkung dipunremeni dening para masyarakat. Sahingga taraf kesehatan masyarakat saged mindhak lan gerah degeneratif saged mandhap.

Tembang Gambuh

Dhaharan sehat iku

Sawijine tradhisional tuhu

Eca rasane kathah kandungan gizi

Ning sakiki uwis luntur

Mula mangga kita anggo

Sumangga kita para mudha nglestantunaken dhaharan tradhisional ingkang nggadhahi kathah kesaenan punika. Mugi-mugi kesehatan lan kasejahteraan tansah ngiringi kula lan panjenengan sedaya. Aamiin aamiin ya rabbal alamin

Cekap semanten ingkang kula aturaken. Matur nuwun awit kawigatosanipun. Kathah kalepatan, kula nyuwun pangapunten.

Jenang glali, rasane legi

Tetep lestari, budaya jawi

Wabilahitaufiq wal hidayah

Wassalamualaikum warrahmatullahi wabarakatuh

Salam budaya